Përkundër pamjeve të publikuara ekskluzivisht nga Ora News, policia e Tiranës nuk ka mundur ende të identifikojë autorin e vrasjes së Jurgen Dukës, ngjarje e ndodhur në orët e para të mëngjesit të sotëm në një market në rrugën “Irfan Tomini” në Tiranë.
Vështirësia në identifikim sipas burimeve të policisë lidhet me faktin se autori i vrasjes nuk është banor i asaj zone.
Mendohet se ai të jetë nga një zonë tjetër por ka ndaluar për të bërë blerje duke qenë se ai market qëndron 24 orë i hapur.
Të njëjtat burime bëjnë me dije se autori pas ngjarjes është larguar me një automjet në drejtim të Kombinatit.
Policia përmes kamerave të sigurisë ka mundur të ndjekë lëvizjet e tij deri në një segment rrugor por më pas ka humbur gjurmët e tij.
Deri tani uniformat blu kanë shoqëruar disa persona që kanë dijeni mbi ngjarjen ndërtsa me interes pritet marrja në pyetje e shokut të 29-vjeçarit të vrarë, Jurgen Duka.
