Bie me 27 mije numri i nxënësve dhe studentëve të regjistruar në arsim. Nga të gjitha ciklet, arsimi i detyruar ka numrin më të ulët të nxënësve të regjistruar, rreth 8 mijë me pak se një vit më parë.
Në shkolla dhe universitete këtë vit u regjistruan 27 mijë të rinj më pak.
Nga të gjitha ciklet, arsimi i detyruar ka numrin më të ulët.
Një raport i INSTAT informon se gjatë këtij viti shkollor, mësimin 9-vjeçar e kanë ndjekur 286 mijë nxënës, afro 8 mijë më pak se një vit më parë.
Ndjeshëm ka rënë dhe numri i të rinjve që ndjekin arsimin e mesëm.
Këtë vit janë ulur në bankat e gjimnazeve 103 mijë nxënës, rreth 6.5 mijë më pak se vitin e shkuar.
Këtij trendi nuk i kanë shpëtuar as universitetet. Studimet e larta këtë vit akademik i kanë ndjekur në distancë 123 mijë studentë ose 6 mijë më pak se në vitin 2019.
Ulja e numrit të përgjithshëm të studentëve që ndjekin arsimin e lartë është më i theksuar në fushat shkenca natyrore, matematikë dhe statistikë, bujqësi, pyje, peshkim dhe veterinari.
Të dhënat paraqesin rritje të numrit të studentëve në fushën shëndet dhe mirëqënie.
Rënia natyrore e popullsisë, braktisja e shkollës për arsye emigrimi por edhe pandemia, mund të jenë disa prej arsyeve të rënies së regjistrimeve në shkolla dhe universitete.
Ora tv
