Arbitri Elis Pulaj është goditur ditën e sotme me gurë gjatë ndeshjes Delvina-Albpetroli.
Ngjarja ka ndodhur në stadiumin e Delvinës, ndërkohë që arbitri është nisur për në spitalin e Sarandës ku ka marrë ndihmën e nevojshme shëndetësore.
Në lidhje me këtë akt të rëndë ka reaguar edhe Federata Shqiptare e Futbollit, e cila ka dënuar dhunën e ushtruar ndaj Pulajt. FSHF ka kërkuar angazhimin e Policisë dhe prokurorisë për nisjen e hetimeve të menjëhershme.
Reagimi i FSHF
Federata Shqiptare e Futbollit dënon ashpër dhunën e ushtruar ndaj gjyqtarit Elis Pulaj gjatë ndeshjes Delvina-Albpetroli, e vlefshme për javën e 7-të të Kategorisë së Dytë, Grupi B.
Njëkohësisht, Federata e Futbollit kërkon nga organet ligjzbatuese që të marrin masa të forta për të ndalur aktet e dhunshme, që prishin imazhin e futbollit. Gjithashtu, u bëjmë thirrje Policisë së Shtetit dhe Prokurorisë që veprojnë sa më parë për të ndaluar shkaktarët e dhunës dhe t’i vënë ata para drejtësisë.
Sakaq, Federata Shqiptare e Futbollit do të caktojë një inspektor disipline për të kryer një hetim disiplinor në lidhje me incidentin dhe dhunën ndaj gjyqtarit.
Është e papranueshme që futbolli të penalizohet për shkak të disa individëve të dhunshëm e të papërgjegjshëm.
Federata e konsideron të rëndë ngjarjen e ndodhur në Delvinë e që nuk ka asnjë lidhje me lojën e futbollit dhe frymën e “Fair Play”. Së fundmi kërkojmë nga sportdashësit, që të distancohen nga veprime të tilla të dhunshme, që nuk kanë asnjë lidhje me lojën e bukur të futbollit, por vetëm e dëmtojnë atë.
Ora tv
