Ministrja e Infrastrukturës dhe Energjisë, Belinda Balluku tha se qeveria mbrojti mbi 1 milion abonentë familjarë nga rritja e çmimit të energjisë elektrike.
Teksa prezantoi objektivat, por dhe arritjet e ministrisë për vitin 2022, Balluku pohoi se gjithashtu u mbrojtën edhe 172 mijë biznese të vogla.
Ajo theksoi se qeveria ia ka dalë të përballojë situatën e krizës energjetike falë menaxhimit të mirë jo vetëm të Kaskadës së Drinit, por dhe nga bashkëpunimit me fqinjët.
“Ne ia kemi dalë që të qëndronim në parashikimet që kemi pasur në skenarët për mbështetje buxhetore nga buxheti i shtetit. Pavarësisht se jemi përballur me çmime importi historikisht më të lartat ndonjëherë, 31 gushti, unë i referohem kësaj date pasi është një nga momentet më kulminante të tregut të energjisë elektrike, i cili arriti deri në 1044 euro për megavat orë. Megjithatë, me të gjithë punën e mirë që u bë për menaxhimin e Kaskadës së Drinit, pavarësisht kushteve të thatësirës, duke optimizuar atë rezervë energjetike, duke bashkëpunuar me fqinjët tanë për depozitim të energjisë në momentet që kemi pasur dhe duke optimizuar edhe blerjen e importit, ia kemi dalë që mbi të gjitha, të mbrojmë 1 milion e 90 mijë abonentë familjarë, kemi mbrojtur 172 mijë biznese të vogla dhe 7500 biznese të lidhura në tensionin e mesëm”, theksoi zv.kryeministrja, e cila foli dhe për investimet në infrastrukutrë.
