Barcelona ka mbyllur merkaton verore me një bilanc pozitiv prej gati 19 milionë eurosh.
Drejtuesit sportivë, nën udhëheqjen e Deco-s, arritën të përmbushin objektivat si në aspektin financiar, ashtu edhe në atë sportiv.
Klubi ka shpenzuar rreth 29 milionë euro për afrime, ndërsa nga shitjet dhe klauzolat e vjetra ka arkëtuar mbi 47 milionë.
Në kampin blaugrana janë bashkuar tre futbollistë të rinj: portieri Joan García, një investim për të ardhmen dhe zëvendësues i Ter Stegen; sulmuesi anglez Marcus Rashford, i marrë në huazim nga Manchester United me opsion blerjeje 30 milionë euro; si dhe talenti i krahut të djathtë, Roony Bardghji, i transferuar nga Kopenhagen për 2.5 milionë euro.
Sa i përket largimeve, vetëm pak lojtarë të skuadrës së parë kanë ndryshuar ambient, mes tyre Pau Víctor, Pablo Torre dhe Iñaki Peña. Pjesa tjetër e të ardhurave ka ardhur nga përqindjet e mbajtura në shitjet e ish-lojtarëve, si Trincao dhe Todibo, që i sollën Barcelonës mbi 19 milionë euro vetëm nga këto marrëveshje.
Me këtë bilanc, klubi katalanas jo vetëm ka arritur të forcojë skuadrën, por edhe të gjenerojë një suficit të rëndësishëm financiar, duke i dhënë presidentit Joan Laporta arsye për të duartrokitur punën e bërë në merkato.
