Komisioni Hetimor Parlamentar për rrjedhjen e të dhënave nga sistemi “TIMS”, ndryshe nga ai për koncesionet në Shëndetësi, ka avancuar ndjeshëm dhe në mbledhjen e dytë të tij, e cila do të mbahet sot, pritet të miratohet plani paraprak i hetimeve.
Kryetari i komisionit, deputeti i PD, Ervin Salianji ka thirrur mbledhjen e radhës këtë të hënë në orën 12.00. Në këtë mbledhje pritet të caktohen ekspertët që do të ndihmojnë punën e Komisionit Hetimor.
Berisha del nga shtëpia?
Moment interesant duket të jetë thirrja e ish-kryeministrit Sali Berisha për të dëshmuar para këtij komisioni. Kryetari i komisionit të TIMS, Ervin Salianji ka rënë dakord me propozimet e PS duke vendosur në listën e dëshmitarëve që do të thirren para hetimorit edhe emrin e Sali Berishës, Lulzim Bashës e Gazment Bardhit
Më herët komisioni ishte dakorduar për t’i dërguar ftesë kryeministrit Edi Rama, ministrit të Brendshëm Taulant Balla, paraardhësit të tij, Bledi Çuçi, drejtorit aktual të Policisë së Shtetit, Muhamet Rrumbullaku dhe ish-drejtuesit Gledis Nano. Po ashtu, ftesat do t’u dërgohen edhe kreut aktual të SHISH, Vlora Hyseni dhe paraardhësit të saj, Oljan Kanushi.
Por si do të administrohet dëshmia e Sali Berishës në arrest shtëpie?
Ish-kryeministrit i janë rrëzuar të gjitha kërkesat e tij për të marrë pjesë në seanca plenare, teksa hetimet SPAK vendosi t’i zgjasë me 3 vite. Megjithatë, për të marrë në pyetje Berishën, Komisioni Hetimor për TIMS duhet marrë miratimin nga Prokuroria e Posaçme, pasi Berisha që prej 30 dhjetorit ndodhet në arrest shtëpie dhe nën hetim për aferën e klubit partizani.
Gjithashtu, Komisionit Hetimor të TIMS do t’i drejtohen për të dhënë dëshmi edhe Lulzim Basha me Gazment Bardhin si persona që kanë dijeni për atë që mund të ketë ndodhur me rrjedhjen e të dhënave, pasi kanë qenë ata që kanë përcjellë denoncime përmes qëndrimeve të tyre publike.
Hetimi konsiderohet i hapur dhe Komisioni i TIMS duhet të përfundojë veprimtarinë e tij brenda afatit të caktuar me vendim të Kuvendit 21 Korrik 2024.
BalkanWeb
