Një 21-vjeçar ka humbur jetën dhe dy të tjerë janë plagosur pasi pema gjigante e Krishtlindjes u rrëzua gjatë një stuhie.
Struktura prej 184 metrash, e ndërtuar në një lagunë pranë Rio de Zhaneiros, Brazil , u rrëzua në ujë të hënën pasdite. Tre punëtorë që kishin ngritur pemën përpara hapjes së saj zyrtare po përpiqeshin të arrinin të sigurtë kur u goditën nga struktura.
Meteorologët kishin lëshuar një paralajmërim për mot të keq përpara shembjes së strukturës. Pamjet e momentit dramatik tregojnë punëtorë të tjerë duke u hedhur në ujë dhe duke u përpjekur të largohen me not nga pema para se ajo të rrëzohej.
Një hetim policor për tragjedinë është hapur dhe aktualisht është në vazhdim. 21-vjeçari që u vra është identifikuar si Vinicius dos Santos Abreu. Ai u dërgua me urgjencë në spitalin Conde Modesto Leal në Marica, por u shpall i vdekur pas mbërritjes. Dy burrat që u plagosën u dërguan në një spital tjetër ku mësohet se janë “jashtë rrezikut”.
Ishte planifikuar një ceremoni madhështore, ku do të ndizeshin 360,000 dritat e pemës të mërkurën. Krerët e bashkisë thanë në një deklaratë gjatë natës: “Bashkia e Maricës shpreh keqardhje të thellë për tragjedinë që ndodhi pasditen e djeshme në Lagunën e Araçatiba, kur një person vdiq dhe dy u plagosën pasi u shemb struktura e pemës së Krishtlindjes që po montohej.
“Bashkia po ofron mbështetje të plotë për viktimat dhe familjet e tyre, si dhe po heton shkaqet e aksidentit. Sapo Mbrojtja Civile lëshoi një paralajmërim për shi të dendur në orën 15:45 të ditës së djeshme, kompania e punësuar për të montuar pemën filloi të largonte punëtorët nga zona.
“Në atë moment ata u befasuan nga një stuhi, me erëra të forta dhe reshje të dendura shiu, të cilat e rrëzuan strukturën në pak sekonda. Viktimat u shpëtuan menjëherë nga reaguesit e urgjencës, përfshirë zjarrfikësit dhe stafin mjekësor.
“Një nga punonjësit u dërgua në Spitalin Bashkiak Conde Modesto Leal, ku nuk mundi të kapërcejë plagët dhe u shpall i vdekur. Dy personat e tjerë, të cilët u trajtuan në Spitalin Bashkiak Doktor Ernesto Che Guevara, janë jashtë rrezikut për jetën”.
(A.A/BalkanWeb)
