Rreth orës 17:10 të pasdites së sotme, një i mitur 15 vjeç është paraqitur në spital për ndihmë mjekësore, pasi është plagosur me armë zjarri brenda një picerie në zonën e “Ali Demit”.
Policia dyshon se ngjarja mund të ketë ndodhur si pasojë e një shkrepjeje të pavullnetshme gjatë një momenti brenda picerisë. Sipas të dhënave dëshmitarët nuk kanë konstatuar ndonjë konflikt mes të miturit dhe autorit të dyshuar.
Sipas të dhënave paraprake, i mituri është plagosur në qafë, por ndodhet jashtë rrezikut për jetën dhe në gjendje të qëndrueshme në spital, sipas gazetares së Top Channel, Dorjana Bezat.
Menjëherë pas ngjarjes, shërbimet e Policisë dhe grupi hetimor kanë mbërritur në vendngjarje dhe kanë bërë të mundur identifikimin e autorit të dyshuar, i cili dyshohet të jetë një punonjës i picerisë, konkretisht motorristi.
Punohet intensivisht për lokalizimin dhe arrestimin e tij, si dhe për dokumentimin e plotë të rrethanave të kësaj ngjarjeje.
