Vija bregdetare e ishullit Hormuz në Iran është shndërruar ditët e fundit në një peizazh që të kujton planetin Mars, me imazhe të detit që ka marrë një ngjyrë të kuqe të thellë dhe që kanë qarkulluar gjerësisht në mbarë botën.
Sipas ish-drejtorit të Shërbimit Meteorologjik Helenik, Theodore Kolidas, fenomeni, ndonëse vizualisht mbresëlënës, nuk ka asgjë misterioze. “Bëhet fjalë për një mekanizëm thjesht gjeologjik dhe hidrometeorologjik”, shpjegon ai në një postim në platformën X.
Kolidas thekson se ishulli i Hormuzit njihet edhe si “Ishulli i Ylberit”, për shkak të tokave jashtëzakonisht të pasura me okside hekuri, kryesisht hematit. Gjatë periudhave me reshje intensive ose të zgjatura, ky material i imët lahet nga shpatet e ishullit, transportohet nga rrjedhja sipërfaqësore dhe përfundon në det. Pezullimi i sedimenteve të pasura me hekur i jep ujit ngjyrën karakteristike të kuqe, veçanërisht pranë vijës bregdetare.
Nga këndvështrimi meteorologjik, episode të tilla lidhen me reshje të rralla, por shumë të dendura, në një rajon që zakonisht është i thatë. “Toka e thatë, me kapacitet të kufizuar infiltrimi, favorizon rrjedhjen e shpejtë sipërfaqësore, duke rritur ndjeshëm transportin e sedimenteve”, shpjegon Kolidas.
Ai e përshkruan fenomenin si “një shembull klasik se si ngjarjet ekstreme hidrologjike mund të nxjerrin në pah identitetin gjeologjik të një vendi brenda vetëm pak orësh”, duke theksuar se pamjet nuk lidhen me ndotje mjedisore. Përkundrazi, bëhet fjalë për një proces natyror, i cili është vërejtur edhe më parë në Hormuz, por që bëhet veçanërisht spektakolar gjatë periudhave me reshje intensive.
Fenomene të ngjashme janë regjistruar edhe në vende të tjera të botës, në zona me toka të pasura me hekur ose argjilë, kur këto kombinohen me episode të dendura shiu
