Koha e pajisjes më kartë identiteti në vend ka ndryshuar ditën e sotme. Mësohet se nga 14 ditë koha e pajisjes me kartë identiteti ka zbritur në 3 ditë. Njoftimin për këtë ndryshim e ka bërë të ditur kompania shtetërore e prodhimit të dokumenteve biometrike, IdentiTek. Po ashtu në njoftim bëhet me dije se shërbimi do të ofrohet kundrejt një pagese prej 3 000 lekësh nga 1 500 lekë që ishte më parë.
Njoftimi i Plotë:
Falë këtij shërbimi, përmes një pagese prej 3 mijë lekësh, çdo qytetar mund të pajiset me letërnjoftim elektronik brenda 3 ditësh. Shërbimi është krijuar për të lehtësuar dhe përshpejtuar procesin e aplikimit, duke u ardhur në ndihmë qytetarëve që kanë nevojë urgjente për dokumentin e tyre të identifikimit. Procedura e përshpejtuar është veçanërisht e dobishme për emigrantët, të cilët qëndrojnë për pak ditë në Shqipëri, si edhe për të gjithë ata që kanë nevojë të marrin shpejt kartën e tyre të identitetit, qoftë për arsye personale, profesionale apo administrative”.
•Blini kuponin (me procedurë të përshpejtuar);
•Merrni me vete dokumentin e vjetër ose vetëdeklarimin e humbjes/vjedhjes nga e-Albania;
•Bëni aplikimin në një nga zyrat e IdentiTek;
•Tërhiqni kartën e re po aty ku keni bërë aplikimin.
Ky shërbim është i aksesueshëm për të gjithë qytetarët shqiptarë, duke përfshirë:
•Ata që pajisen për herë të parë me letërnjoftim elektronik;
•Ata që rinovojnë dokumentin e skaduar;
•Ata që kërkojnë zëvendësim për shkak të skadimit, dëmtimit apo humbjes.
