Athinë – Një 54-vjeçare u arrestua në Menidi, në perëndim të kryeqytetit grek, nën akuzat për dhunë në familje dhe shkaktim të dëmtimeve të rënda trupore, pasi vajza e saj 14-vjeçare raportoi se kishte pësuar një abort spontan pas një sulmi të dyshuar, bënë të ditur autoritetet.
Sipas policisë, adoleshentja – e cila dyshohet se është me origjinë shqiptare – u paraqit në komisariatin lokal dhe denoncoi të ëmën. Ajo mbante me vete një çantë ku, sipas hetuesve, ndodhej fetusi i pajetë.
Menjëherë pas denoncimit, oficerët shkuan në banesën familjare dhe ndaluan 54-vjeçaren. Ndërkohë, me urdhër të prokurorit, vajza 14-vjeçare u dërgua në Spitalin e Fëmijëve “Paidon” në Athinë, ku po merr trajtim mjekësor dhe mbështetje psikologjike.
Hetimet për ngjarjen vijojnë, ndërsa autoritetet po mbledhin prova dhe dëshmi për të përcaktuar plotësisht rrethanat e incidentit.
