Është grabitur nën kërcënimin e armës dhe sendeve të forta një furgon mallrash në Fushë Krujë.
Ngjarja ka ndodhur mëngjesin e sotëm pranë rreth-rrotullimit të Thumanës, ndërsa mësohet se tre persona kanë kërcënuar shoferin e furgonit me banane dhe i kanë marrë mjetin.
Sipas dëshmive paraprake, autorët kanë qenë të maskuar, ndërsa policia pasi ka marrë njoftimin është vënë në ndjekje të mjetit furgon.
Më pas mjeti është gjetur i braktisur në një fshat të Kurbinit, ndërsa mbetet e paqartë se çfarë i ka shtyrë autorët që të grabisin një mjet me banane.
Pritet që të merret në pyetje drejtuesi i furgonit, për të hedhur më shumë dritë mbi grabitjen, edhe pse identifikimi i autorëve duket të jetë i vështirë sa kohë që kanë qenë të maskuar.
(E.K/Faxweb.al)
