Ajo dje kur të gjithë moshatarët u ulën në bankat e shkollës i pa ata nga muri.
Ndërsa sot, Eglina e vogël realizoi kaq shpejt dëshirën e saj. Me një çantë të re, e veshur bukur dhe me gjithçka të re, ajo padyshim do ketë kaluar natën më të gjatë të jetës së saj e mbuluar nga emocionet, pasi sot shkoi në shkollë.
Një ditë më parë Rtv Ora dhe Ora News transmetuan rastin e 8-vjeçares, Eglina Gace, e cila mes lotësh kishte vetëm një lutje, të shkonte në shkollë.
Një dëshirë që u plotësua jo farë ndonjë reagimi të ndonjë institucioni, por falë ndihmës bujare dhe iniciativave private, të cilat dërguan në shtëpinë e saj, që gjithashtu në kushte të këqija, mjetet e shkollës dhe veshje të reja.
Me sy të qeshur nga lumturia, ajo iu bashkua shokëve dhe shoqeve.
E ëma e vogëlushes që vuan nga tumor në kokë shprehet e lumtur që vajza e saj po rikthehet në bankat e klasës.
“Jam shumë e lumtur, që e çoj gocën në shkollë si të gjithë të tjerët. Jam shumë e kënaqur. Zoti ju shpërbleftë dhe Zoti ju ruajt që ma çuat gocën në shkollë.”
Biznesmenë e qytetarë nga Shqipëria, Norvegjia, Zvicra e Anglia kontribuan që Eglina të kthehet në shkollë, ndërkohë që dhjetëra familje të tjera, që janë në të njëjta kushte, aty ku media nuk arrin, varfëria vijon të jetë e ulur këmbë kryq.
/Ora News/
