Burime bëjnë me dije për Faxweb.al se paraditen e sotme, është ekstraduar në Shqipëri nga Gjermania, Hekuran Marku, një nga bodygardët e ish-ministrit Saimir Tahiri.
Hekuran Marku ishte arrestuar në Gjermani në Gusht të vitit të kaluar, ndërsa kolegu i tij Paul Deda alias Agustin Deda është arrestuar në Francë.
Marku dhe Deda akuzohen se gjatë kohës që kanë shërbyer si truproja të ministrit Tahiri kanë trafikuar rreth 1 ton kanabis drejt Italisë.
Përfshirja e tyre në trafikun e drogës ka dalë nga dëshmia e 4 të penduarve të drejtësisë të cilët kanë rrëfyer në Bari për rrjetin e trafikut nga Shqipëria drejt Italisë.
Ndërsa Marku është arrestuar, Deda ka kërkuar azil politik në Francë dhe kërkesa e tij po shqyrtohet nga autoritetet vendase.
Operacioni “Shpirti” kundër trafikut ndërkombëtar të drogës u zhvillua më 7 korrik të vitit të kaluar, në bashkëpunim me institucionet italiane të drejtësisë.
38 persona janë arrestuar për akuza të ndryshme si korrupsion, abuzim me detyrën, pastrim parash, trafik ndërkombëtar droge.
