Pas më shumë se katër muajsh verifikimesh, intervistimesh dhe kontrolli të plotë integriteti, komisioni i posaçëm i përbërë nga Altin Dumani, Arben Kraja dhe Behar Dibra ka propozuar hetuesin Joni Keta për të drejtuar Byronë Kombëtare të Hetimit për pesë vitet e ardhshme.
Procesi është zhvilluar nën mbikëqyrjen e partnerëve ndërkombëtarë, filtronte 7 kandidatë, mes tyre katër efektivë policie, dy hetues të BKH-së dhe një prokuror, duke finalizuar sot emrin e vetëm që i kalon për vendimmarrje Këshillit të Lartë të Prokurorisë.
“Komisioni i Përzgjedhjes për pozicionin e Drejtorit të Byrosë Kombëtare të Hetimit (BKH) në mbledhjen e tij të datës, 26.11.2025, në prani të përfaqësuesve të ICITAP dhe Bashkimit Europian, vendosi t’i rekomandojë Këshillit të Lartë të Prokurorisë, për emërim, në pozicionin e Drejtorit të Byrosë Kombëtare të Hetimit, z.Joni Keta, për një mandat 5-vjeçar“, thuhet në njoftimin e SPAK.
KLP pritet të zyrtarizojë emërimin e Ketës në mbledhjen e 2 dhjetorit, ndërsa më 11 dhjetor pritet gara tjetër e rëndësishme: zgjedhja e kreut të ri të SPAK, që mbyll një prej proceseve më të ndjeshme të drejtësisë së re.
7 Garuesit për kreun e BKH-së ishin Andi Pogaçe, Artur Beu, Elton Kërluku, Gentian Ndoi, Gentjan Shehaj, Gledis Nano dhe Joni Keta./vizionplus.tv
