Një fabrikë kimikatesh në Illinois Veriore u përfshi nga flakët duke detyruar banorët përreth zonës të evakuoheshin.
Kushdo që jetonte brenda një milje të uzinës Chemtool Inc. në Rockton u urdhërua të evakuohej pasi flakët u raportuan rreth orës 7 të mëngjesit me orën lokale, thanë zyrtarët e policisë dhe zjarrit .
Shkaku i zjarrit ende nuk dihet.
“Ndërtesa është shumë e konsumuar,” u tha gazetarëve Shefi i Zjarrfikësve në Rockton Kirk Wilson.
Zjarrfikësit rrethuan vendin, por planifikojnë të lënë flakët të vazhdojnë të djegin fabrikën.
Wilson tha se luftimi i flakëve me ujë mund të sillte rrjedhje të rrezikshme në lumin Rock, një degë e lumit Misisipi.
“Gjëja kryesore është që ne nuk duam të ndodhë një makth mjedisor,” tha Wilson.
“Kështu që ne ndaluam operacionet e ujit në këtë pikë. Ne menduam se ishte në interesin tonë më të mirë ta linim këtë ndërtesë të digjej.”
Rockton Chemtool prodhon yndyrë, lubrifikantë dhe lëngje, duke përfshirë shumë që janë të ndezshme dhe mund të kenë shkaktuar zjarrin, njoftoi ABC7 Chicago.
Zyrtarët thanë se ishin të shqetësuar se kimikatet si acidi sulfurik, azoti dhe plumbi mund të përhapen përmes tymit, megjithëse monitorët e nivelit të tokës deri më tani nuk treguan ndonjë ndikim në cilësinë e ajrit.
