Mëngjesin e së martës, më 26 gusht, pak para orës 10:00, 40-vjeçari Pandeli Nakoleci i cili pranoi vrasjen e gruas së tij 36-vjeçare, mbërriti në Zyrën e Oficerit Hetues me kokën ulur.
Ai nuk iu përgjigj asnjë pyetjeje të gazetarëve, ndërsa roja i hapi rrugën që të kalonte. Në fakt, për të shmangur linçimin nga turma e zemëruar që ishte mbledhur, 40-vjeçari hyri në gjykatat e Volosit nga dera e pasme, ndërsa mbante veshur edhe një jelek antiplumb.
Në të njëjtën kohë, në orën 11:00, do të zhvillohet në Shqipëri funerali i nënës 36-vjeçare që humbi jetën në hyrje të pallatit ku jetonte me 40-vjeçarin në Volos. Vajza e madhe e çiftit “premtoi” se do të vishte një fustan të bardhë në mënyrë që të ishte e bukur në udhëtimin e saj të fundit.
40-vjeçari, i cili ka pranuar vrasjen, synon të përmendë tentativën e tij të fundit për vetëvrasje në fillim të verës, si dhe izolimin e tij në një klinikë psikiatrike, duke deklaruar se dëshiron një mendim eksperti psikiatrik.
Në dëshminë e tij, ai i mohon kategorikisht akuzat e fëmijëve të tij se ka ushtruar dhunë sistematike ndaj nënës së tyre, duke pretenduar se nuk është akuzuar kurrë për dhunë në familje.
Fillimisht ai dukej i papenduar, por tani deklaron pendim, duke kërkuar falje dhe duke pretenduar se e vrau gruan e tij “në një moment tërbimi “. Siç thuhet se dëshmoi ai, martesa e tyre ishte shkatërruar që nga Pashkët e kaluar, kur mësoi për lidhjen jashtëmartesore të 36-vjeçares.
Duke përshkruar ditën fatale, ai tha se rrëmbeu nga ballkoni një mjet të mprehtë që përdorej në familje për barbeque dhe sulmoi gruan e tij, duke pretenduar se “nuk e kuptoi” se si e vrau atë.
Po ashtu thuhet se ka deklaruar se do të kishte preferuar të kishte qenë në vendin e gruas së tij, duke zbuluar se kishte menduar t’i jepte fund jetës në burg.
