PSG pësoi humbjen e radhës në Ligue 1, por ky është vetëm fundi i një sezoni shumë zhgënjyes për tifozët, me këta të fundit që janë kthyer kundër të gjithëve, madje edhe kundër Al-Khelaifit, “bosi” që riktheu edhe një herë në majë klubin francez. Në fund të këtij sezoni, PSG pritet të përfshihet në një tjetër revolucion, i pari i cili pritet të largohet është trajneri Christophe Galtier.
L’Equipe ka hapur faqen e parë këtë të martë me një titull shumë të fortë: “Mashtrimi i Messi-t”. E përditshmja franceze shkruan se sulmuesi argjentinas pavarësisht humbjes së pësuar përballë Lorinet, ka fluturuar drejt Arabisë Saudite për një “takim të papritur”. Messi ka lënë ekipin dhe stërvitjen për një punë personale.
Sipas L’Equipe, ky vendim i “pleshtit” nuk është pritur mirë nga stafi drejtues i PSG. Në Paris flitet prej kohësh se Messi nuk pritet të rinovojë kontratën e tij aktuale që i përfundon në fund të këtij sezoni.
(BalkanWeb)
