“Në ditën e Festave Kombëtare mbillen 8 mijë fidane pishe :Dhjetëra vullnetarë dhe një mision për Shqipërinë e gjelbër” në Gramshin shkrumbuar nga zjarret apokaliptike të verës.Ky 28 Nëntor nuk ishte thjesht një ditë feste, por një ditë veprimi, frymëzimi dhe dashurie për natyrën dhe Atdheun. Në një nismë të ndërmarrë nga Ervin Skenderi, i riu energjik nga Elbasani, i apasionuar pas sportit dhe natyrës, dhjetëra aktivistë nga e gjithë Shqipëria ,madje edhe të huaj ,u bashkuan për të mbjellë jetë të re në tokën shqiptare.
Aksioni mori përmasa kombëtare. Dhurues nga diaspora shqiptare, Tirana, Elbasani dhe shumë qytete të tjera kontribuuan me vullnet e mbështetje. Falë këtij rrjeti bashkëpunimi të krijuar në kohë rekord, u grumbulluan mbi 8 mijë fidane, një shifër mbresëlënëse për një nismë vullnetare.
Sot u arrit të mbilleshin rreth 600 fidane, ndërsa mbi 2000 të tjerë presin të marrin jetë nga duart e vullnetarëve nesër.
Pezmatimi, organizimi dhe mikpritja u bënë të mundura nga Bio Farm Gramshi, që vuri në dispozicion mjetet, motomjetet, logjistikën dhe hapësirat e saj për të lehtësuar gjithë procesin – nga mbartja e fidanëve e deri tek hapja e gropave dhe pritja e vullnetarëve.
Ky aksion është një shembull i jashtëzakonshëm i forcës që lind kur dashuria për Atdheun dhe natyrën bashkon njerëz të përkushtuar. Një mënyrë e mrekullueshme për të uruar dhe nderuar 28 Nëntorin ,Ditën e Flamurit dhe të Pavarësisë.
Pastë sa më shumë njerëz të tillë që mbjellin jetë, shpresë dhe gjelbërim.
