Ministria e Drejtësisë në Greqi pritet të bëjë ndryshime drastike në Kodin Penal, për sa i përket rasteve të përdhunimeve të miturve, vrasjeve të grave, dhunës në punë dhe shpërndarjes së lajmeve të rreme.
Burgim të përjetshëm për përdhunimin e të miturve
Shfrytëzimi i të miturve, incesti etj konsiderohen krime dhe dënimi i parashikuar nga ligji do të jetë me burgim, ndërsa për herë të parë rastet e përdhunimeve ndaj të miturve do të dënohen me burgim të përjetshëm.
Gjithashtu, pritet të vendosen kritere të reja objektive për përllogaritjen e masës minimale të dënimit.
Burgimi i përjetshëm do të aplikohet dhe për personat që akuzohen për vrasje, grabitje vdekjeprurëse dhe përdhunim vdekjeprurës.
Për ata që vuajnë dënimin me burgim të përjetshëm për veprat e mësipërme, koha aktuale e qendrimit brenda burgut rritet nga 16 vjet në 18 vjet
Çfarë pritet të ndryshojë për vrasjet
Qëllimi i Ministrisë së Drejtësisë është ndëshkimi i vrasjeve me dënime më të rënda. Në sistemin e drejtësisë penale ky ashpërsim është burgimi i përjetshëm.
Afati i fillimit të parashkrimit për krimet kundër lirisë personale, lirisë seksuale dhe shfrytëzimit ekonomik të jetës seksuale ndryshon kur ato kryhen ndaj të miturve.
Incesti konsiderohet krim dhe vepra e kryerjes së marrëdhënieve seksuale me të mitur (joshja) do të dënohet si krim në të gjitha format e tij.
Nga 3 deri në 5 vjet burg për krimin e vjedhjes
Lidhur me krimin e vjedhjes, i cili aktualisht dënohet me 3 vjet burg, tashmë do të dënohet deri në 5 vjet burg./Ora News/
