Do të hidhet sot në Monako të Francës shorti i Uefa Champions League. 32 skuadra do të jenë në garë për kompeticionin më të rëndësishëm europian.
Ekipet do të jenë të ndarë në 4 vazo prej të cilave do të përcaktohen 8 grupet e fazës së parë të kompeticionit. Shorti do të nis në orën 18:00.
Në vazon e parë janë fitueset e ligave më të rëndësishme europiane së bashku me fituesin e Champions League dhe të Europa League të vitit të shkuar. Interesant është fakti që mbreti i këtij trofeu, Real Madrid është në vazon e dytë. Nuk është çudi të kemi një përballje mes Manchester City dhe Real Madrid që në fazën e grupeve.
Në vazon e dytë ndodhet edhe Arsenal, i rikthyer në këtë Champions League pas shumë vitesh mungesë. Ndërsa skuadra e Milanit është në vazon e tretë.
Për herë të parë në Champions do të marrë pjesë skuadra gjermane e Union Berlin, ekipi që befasoi vjet në Bundesligën gjermane.
Nga faza e grupeve do të kualifikohen për më tej 16 skuadra, ndërsa finalja e madhe e këtij edicioni do të zhvillohet në Wembley Stadium në Londër më datë 1 qershor 2024.
