Drejtoria Vendore e Policisë Tiranë ka reaguar pas publikimit të një videoje në rrjetet sociale, ku shfaqej një i ri me shenja dhune në fytyrë mes efektivëve të policisë.
Policia sqaron se më datë 05.12.2024, në rrugën “Myslym Keta”, mjeti me drejtues shtetasin Fatjon Gjuzi, është përfshirë në një përplasje me mjetin me drejtuese shtetasen R. M., dhe më pas shtetasi Fatjon Gjuzi është larguar nga vendi i ngjarjes.
Pasi patrulla e qarkullimit ka arritur në vendngjarje dhe ka marrë kontakt me shtetasen R. M., është rikthyer në vendngjarje dhe shtetasi Fatjon Gjuzi së bashku me mjetin e përfshirë në aksident dhe ka nisur debat me drejtuesen e mjetit.
Shërbimet e Policisë kanë ndërhyrë për të qetësuar situatën, por gjatë ndërhyrjes, shtetasi F. Gj. ka filluar të ofendojë punonjësit e policisë, dhe gjatë përpjekjes për ta neutralizuar, shtetasi Fatjon Gjuzi nuk i është bindur urdhrave dhe ka goditur me grushte një punonjës Policie.
Më pas drejtuesi i mjetit, shtetasi Fatjon Gjuzi, është shoqëruar në komisariat ku i është bërë testi i alkoolit i cili ka rezultuar:
• Testi i parë: 0.82 mg/l
• Testi i dytë: 0.66 mg/l
• Testi i tretë: 0.71 mg/l.
Në vijim të veprimeve është bërë arrestimi i tij për veprat penale “Goditjet për shkak të detyrës”, “Kanosja për shkak të detyrës”, dhe “Drejtimi i automjeteve në mënyrë të parregullt”.
Punonjësi i Policisë, si pasojë e dëmtimeve të marra nga goditjet e shtetasit Fatjon Gjuzi ndodhet në regjim me raport mjekësor 10 ditor.
Për këtë rast, Drejtoria Vendore e Policisë Tiranë ka dhënë njoftim për arrestimin e këtij shtetasi më datë 06.12.2024, në përmbledhjen ditore.
