Prokuroria e Fierit ka reaguar lidhur me protestën e punonjëseve të një fasonerie në këtë qytet, që u zhvillua të shtunën përpara godinës së këtij institucioni. Ata kërkojnë që të merret sa më parë në shqyrtim kallëzimi që kanë bërë për pronarët e kompanisë për mos marrjen e pagave për dy muaj.
Në njoftimin e Prokurorisë, thuhet se çështja penale është ende nën hetim. Organi i akuzës njofton se ka regjistruar procedimin për veprën penale “Falimentimi i provokuar”, parashikuar nga neni 193, i Kodit Penal, të paraqitur nga një grup punonjësish të subjektit “O.A” SH.P.K.
Njoftimi i Prokurorisë Fier:
Sqarim nga Prokuroria Fier mbi hetimet për kallëzimin penal të një grupi punonjësish ndaj subjektit O.A. shpk
Nisur nga interesi i lartë dhe ndjeshmëria e çështjes dhe për të sqaruar opinionin publik, Prokuroria pranë Gjykatës së Shkallës së Parë të Juridiksionit të Përgjithshëm Fier bën me dije se më datë 09.08.2023, ka regjistruar procedimin penal nr.957, për veprën penale “Falimentimi i provokuar”, parashikuar nga neni 193, i Kodit Penal.
Ky procedim penal ka filluar mbi bazën e kallëzimit penal të paraqitur nga një grup punonjësish të subjektit “O.A” SH.P.K., me administrator z. E.T, të cilët pretendojnë për shkelje ligjore të kryera nga kjo shoqëri lidhur me mosdhënien e pagave dhe mbylljen e aktivitetit.
Në funksion të hetimeve janë kryer një sërë veprimesh hetimore. Çështja penale është ende në hetim dhe po vijon puna me kryerjen e veprimeve të tjera hetimore me qëllim zbardhjen e plotë të ngjarjes dhe zbulimin e së vërtetës.
