Komisioni Qendror i Zgjedhjeve (KQZ) do të nisë sot në orën 09:00, procesin zyrtar të rinumërimit të 2323 qendrave të votimit, pas vendimit të Komisionit të Ankimimeve dhe Sanksioneve (KAS).
Rinumërimi përfshin edhe 85 kuti votimi nga diaspora dhe do të zhvillohet në ambientet e Pallatit të Sportit “Farie Hoti” në Tiranë. Procesi do të organizohet në 24 tavolina me 24 grupe të posaçme të numërimit dhe do të transmetohet ‘live’ në rrjetet sociale të KQZ-së, duke garantuar transparencë për publikun.
Qarqet e përfshira në këtë proces janë Tiranë, Durrës, Fier dhe Elbasan.
Të drejtën për të pasur vëzhgues gjatë rinumërimit e kanë vetëm subjektet që u legjitimuan nga KAS gjatë shqyrtimit të kërkesave ankimore. Konkretisht:
-Elbasan: Koalicioni PD-ASHM dhe Partia Socialiste;
-Fier: Koalicioni PD-ASHM, Partia Socialiste dhe Koalicioni Nisma – Shqipëria Bëhet;
-Durrës: Koalicioni PD-ASHM dhe Partia Socialiste;
-Tiranë: Koalicioni PD-ASHM, Partia Socialiste dhe partia Mundësia.
