Pavarësisht kundërshtarit që kishte përballë, Laçi bind sërish në Europë, pasi ia doli të triumfojë me rezultatin minimal 1-0 ndaj rumunëve të Universitatea Craiova në “Elbasan Arena” dhe shtoi shanset për një kualifikim në turin e tretë të Conference League.
Shkëndijën e parë të rrezikshme e dhanë rumunët, që në minutën e 11’ i shkuan pranë golit të avantazhit, por sulmuesi Koljic nuk arriti të devijojë topin drejt rrjetës, ndonëse ishte shumë pranë vijës fatale.
Më pas reaguan kurbinasit, që në minutën e 14’ kërcënuan me një goditje nga distanca të Deliut, por grushtoi portieri rumun, ndërsa një minutë më vonë mbrojtësi i Universitateas, Conte u ndëshkua me karton të verdhë pasi ndali një kombinim të shpejtë të Laçit.
Rumunët rritën presionin dhe në minutën e 30’ krijuan rastin më të mirë të shënimit, teksa ia dolën të mposhtin edhe portierin Sherri, por jo mbrojtësin Bashkim Velija, që hoqi topin pak centimetra larg vijës fatale dhe shmangu golin.
Sfida u zhbllokua në minutën e 35-të, teksa pas një kundërsulmi të shpejtë të bardhezinjve kurbinas, topi shkoi në zonë te Zarubica, aty ku sulmuesi malazez u koordinua mirë dhe e dërgoi në rrjetë, duke bërë që në “Elbasan Arena” të shpërthejë festa.
Pjesa e parë përfundoi me avantazhin minimal të kurbinasve, ndërsa 45-minutëshi i dytë nisi vrullshëm për skuadrën rumune, Në minutën e 52-të ishte Cimpanu që lëshoi një goditje të rrezikshme nga distanca, por gardiani shkodran Sherri ia doli të grushtojë jo pa vështirësi.
Universitatea nuk pajtohet me humbjen dhe shton presionin në gjysmëfushën kurbinase, por pa ia dalë të shkojë kërcënueshëm në portën e Sherrit, ndërsa nga ana tjetër Laçi provon të ulë ritmin dhe kundërsulmon rrezikshëm në 2-3 momente.
Në minutën e 75-të ishte sërish Cimpano që kërcënoi sërish portën e bardhezinjve nga Laçi, por topi u devijua dhe përfundoi në këndore. Vetëm tre minuta më vonë kurbinasit pretendojnë për një penallti, por rrëzimi i Guindou në zonë nuk shihet si i tillë nga arbitri kryesor.
Vërshëllima finale e tij la në fuqi triumfin me rezultatin minimal 1-0 në Laçit, që një javë më vonë do të provojë të zhvillojë një tjetër 90-minutësh dinjitoz, për të shkruar historinë, duke kaluar një tjetër tur në Europë./ SuperSport
Top Channel
