Pas më shumë se dy viteve në qeli, ish-kryebashkiaku i Himarës, Jorgo Goro, është liruar nga burgu, pasi ka përfunduar së vuajturi dënimin e dhënë nga Gjykata e Posaçme kundër Korrupsionit dhe Krimit të Organizuar (GJKKO).
Goro u arrestua dhe u dënua për shpërdorim detyre dhe fshehje të pasurisë, akuza që lidhen me periudhën e drejtimit të tij në krye të Bashkisë së Himarës. Procesi gjyqësor ndaj tij zgjoi një interes të gjerë publik, pasi ai ishte një prej zyrtarëve lokalë më të njohur në jug të vendit, ndërsa çështja e pronave dhe menaxhimit të tyre në zonën bregdetare ka qenë prej vitesh një pikë e nxehtë debati.
Sipas përllogaritjeve ligjore, Goro ka kryer të plotë dënimin prej 2 vitesh e 21 ditësh burgim, duke e shlyer kështu në tërësi vendimin penal që rëndonte mbi të. Me përfundimin e këtij afati, ai ka fituar të drejtën të lirohet dhe tashmë ka dalë i lirë.
Gjatë kohës së mbajtjes në burg, ish-kryebashkiaku ka mbetur relativisht i tërhequr nga vëmendja publike, ndërsa nuk dihet ende nëse pas lirimit ai do të rikthehet në jetën politike ose do të qëndrojë jashtë saj.
Çështja e Jorgo Goros mbetet një nga rastet më të përfolura të viteve të fundit në kuadër të hetimeve ndaj zyrtarëve publikë për abuzim me detyrën dhe pasurinë, duke rikthyer në vëmendje edhe problematikat e menaxhimit të tokave në zonën turistike të Himarës./
