Autoritetet meksikane po hetojnë vrasjen e pesë personave në shtetin Guerrero gjatë një konflikti midis trafikantëve të drogës , njoftoi të shtunën zyra e prokurorit të shtetit, ndërsa një OJQ denoncoi një sulm me dron.
“Në lidhje me sulmin e supozuar kundër 30 personave” , ka nisur një hetim për vrasjet e “pesë personave” në komunitetin Buenavista, në komunën Heliodoro Castillo, në shtetin Guerrero (në jugperëndim), tha zyra e prokurorit.
Vrasjet ishin “rezultat i një konflikti midis dy bandave banditë, ‘La Familia Michoacana’ dhe ‘Los Tlacos’, të cilët po konkurrojnë për kontrollin e zonës”, sipas të njëjtit burim.
Të premten, organizata joqeveritare për të drejtat e njeriut Minerva Bello njoftoi se fshati Buenavista ishte “sulmuar nga dronë, mjete shpërthyese”. Pas kësaj ankese, zyra e prokurorit të shtetit Guerrero filloi një hetim që lejoi të vërtetohej se kishte “skelete të djegur të pesë personave brenda një automjeti që iu vu flaka”.
Megjithatë, eshtrat u gjetën nga “banorët e Tetela del Rio”, një komunitet fqinj, dhe autoritetet gjetën vetëm automjetin e djegur, vazhdoi deklarata.
Drejtori i OJQ-së Minerva Bello, prifti Filiberto Velázquez , raportoi dje se ishte informuar nga autoritetet se “njerëzit u vranë” në Buenavista de los Hurtado. “Po flasin për 30 veta”, është përgjigjur ai i pyetur nga një gazetar nëse e di se sa viktima ka.
Dje zoti Velasquez dha një rrëfim më të fundit. “Ne ishim në gjendje të konstatojmë praninë e një automjeti të djegur, brenda të cilit ishte një numër i papërcaktuar trupash të djegur”, tha ai në një deklaratë, duke iu referuar “pesë kafkave”.
“Na u tha se janë gjashtë të mbijetuar”, shtoi ai. “Duhet të kujtojmë se kjo është një zonë e paarritshme, me mjete të kufizuara komunikimi. Prokuroria deklaroi se nuk është vënë në dijeni për ndonjë zhdukje.
Nga ana e saj, sekretariati i sigurisë së shtetit Guerrero njoftoi më herët dje se operacionet e forcave të sigurisë po vijojnë në zonë, ku “sipas dëshmive të banorëve, ka një konflikt mes organizatave kriminale”. Sulmet me dron nga kartelet meksikane të drogës janë regjistruar vazhdimisht në vitet e fundit.
Në shtetin Guerrero, një nga më të varfërit në Meksikë, ku kultivohet kërpi dhe lulëkuqe, lënda e parë për prodhimin e opiumit dhe heroinës, janë aktive banda të ndryshme.
Më shumë se 420,000 vrasje janë kryer në Meksikë, sipas shifrave zyrtare, që kur presidenti i atëhershëm i vendit Felipe Calderon shpalli të ashtuquajturën “luftë kundër drogës” në vitin 2006, me vendosjen e forcave të armatosura brenda vendit për të goditur kartelet. Janë regjistruar gjithashtu mbi 110,000 zhdukje me forcë, shumica që nga viti 2006. Si vrasjet, ashtu edhe zhdukjet me forcë, autoritetet i atribuohen bandave të krimit të organizuar.
