Personi që shihni në foton e mësipërme është Henri Haxhiraj, punonjësi i Gardës së Shqipërisë i cili tentoi aktin ekstrem për t’i dhënë fund jetës. 37-vjeçari i cili është dhe vëllai i këngëtares së njohur Sheila Haxhiraj, pak para mesditës së kësaj të marte qëlloi veten me plumb në kokë, predha e të cilit i përshkoi kafkën tej për tej.
E gjithë ngjarja e rëndë ndodhi në banesën e këtij shtetasi në kryeqytet, në zonën e Qytetit të Studentit. 37-vjeçari në gjendje të rëndë u dërgua menjëherë në Spitalin Ushtarak ku dhe ndodhet në pavionin e intubimit në luftë për jetën.
“Më datë 15.10.2024, në Qytet Studenti, në banesën e tij, ka qëlluar veten me armë zjarri, shtetasi H. H., rreth 37 vjeç, punonjës i Gardës së Republikës. 37-vjeçari është dërguar në spital për ndihmë mjekësore ndërsa grupi hetimor po punon për sqarimin e rrethanave të ngjarjes”, njoftoi Policia e Tiranës më herët.
Emri i Henri Haxhirajt nuk është një emër i panjohur për blutë e Shtetit, por as edhe për mediat. Në janar të 2022 emri i tij u përfol se ishte pjesë e një grupi kriminal të cilët merreshin me prodhimin e dokumentave të huaja të identifikimit, të dyshuara të falsifikuara.
Në kuadër të këtij operacioni policor në pranga ranë 4 persona, mes tyre edhe vëllai i këngëtares së njohur Sheila Haxhiraj, Henri Haxhiraj.
Sipas asaj që Policia e Lezhës bënte me dije aso kohe, Henri Haxhiraj së bashku me të tjerët kishin përfituar shuma të ndryshme monetare të cilat varionin deri në 300 mijë euro nga shtetait e huaj të cilët binin në “grackën” e këtij grupi.
