Drejtoria Vendore e Policisë Elbasan
Specialistët për Hetimin e Krimeve të Komisariatit të Policisë Peqin ekzekutuan masën e sigurisë “Arrest në burg”, për shtetasin H. E., 48 vjeç, i cili ishte me masë sigurie “Arrest në shtëpi”, për veprën penale “Dhuna në familje”.
Specialistët për Hetimin e Krimeve të Komisariatit të Policisë Elbasan referuan materialet në Prokurori, ku nisi procedimi penal për shtetasin E. L., 34 vjeç, pasi dyshohet se ka ndërhyrë në mënyrë të paligjshme në rrjetin e ujësjellësit, duke rilidhur furnizimin me ujë të pijshëm në banesën e tij, të cilin bashkia ia kishte ndërprerë për shkak të mosshlyerjes së detyrimeve financiare.
Specialistët e Qarkullimit Rrugor referuan materialet në Prokurori, ku nisi procedimi penal për shtetasin A. T., 41 vjeç, pasi në aksin rrugor “Cërrik-Gramsh”, automjeti që ai drejtonte është përplasur me dy automjete të tjera, me drejtues shtetasin K. Sh., 24 vjeç, dhe shtetasen turke G. Ç., 21 vjeçe. Si pasojë e aksidentit, janë dëmtuar lehtë shtetasit K. Sh., G. Ç., si dhe një pasagjere në automjetin që drejtohej nga shtetasja G. Ç..
Më datë 20.01.2026, dyshohet se si pasojë e një shkëndije elektrike, ka rënë zjarr në banesën e shtetasit A. P., 51 vjeç, në fshatin Gurish. Nga zjarri janë shkaktuar vetëm dëme materiale.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
