Një gjurmë gishti “nxori zbuluar” Flodian Plakun, në zbardhjen e ngjarjes kriminale të ndodhur në mars të vitit 2024, ku ish-efektivi i Policisë dhe një nga eksponentët e njohur të botës së krimit, Gentjan Bejtja u ekzekutua në oborrin e banesës së tij në fshatin Larush të Fushë-Krujës.
Në fashikujt e dosjes voluminoze të Prokurorisë së Tiranës, thuhet se në automjetin e markës “Volkswagen Golf”, me targa AB960GG, me të cilin autorët u larguan pas atentatit janë zbuluar disa gjurma gishtërinjsh. Këto gjurmë janë pikasur në dorezat mbajtëse të pasagjerëve dhe një prej profileve gjenetike të përftuara i përket Flodian Plakut.
“Në mënyrë të përmbledhur rezulton se automjeti i markës Volksëagen Golf me ngjyrë të zezë dhe targa AA960GG, në pronësi të shtetasit Edison Haxhiu (arrestuar më 19 mars 2024 dhe tashmë ka përfunduar dënimin dhe është liruar), që është përdorur nga autorët për t’u larguar menjëherë pas djegies së automjetit të markës Land Rover në fshatin Hasan, Fushë Krujë, është përftuar profili gjenetik i shtetasve Ilir Beqaraj, alias Ilir Brahimi, alias Ilir Mancellari (arrestuar më 19.03.2024), dhe Flodian Plaku, alias Flodian Serjani, alias Flodian Mamo, të cilët dyshohet se kanë pasur rol në ekzekutimin e shtetasit Gentjan Bejtja, në fshatin Larushk, Fushë Krujë”, thuhet në dosje.
Policia e Vlorës, në bashkëpunim me Forcat e Posaçme Operacionale dhe RENEA-n, prangosën më 3 gusht Flodian Plakun, i njohur edhe me emrat Florian Serjani dhe Florian Mamo. Arrestim i tij u bë i mundur në ambientet e hotelit “Doko” në Radhimë, aty ku dhe ai prej javësh po qëndronte me mikun e tij, Julian Aliajn.
Një skuadër operacionale e Policisë Shtetit, e drejtuar nga prokurori i Tiranës, Ridvan Suka, arritën të lokalizojnë Plakun, i cili është i dyshuar për vrasjen e Gentjan Bejtjas në zonën e Orikumit.
Prej katër muajsh Operacionalja ishte përqendruar në këtë zonë, por nuk mundën që të binin në gjurmët e tij. Falë ndihmës së një berberi nga Vlora, i cili ishte porositur nga miqtë e Plakur për të shkuar në hotelin ku dhe ai po qëndronte, policia mundi që të lokalizonte vendin ku ai po strehohej. Berberi u ndoq nga agjentët e operacionaleve, të cilët e panë duke hyrë në ambientet e hotelit për të qethur Flodian Plakut.
Pas verifikimit të vendndodhjes, RENEA bënë të mundur ndërhyrjen dhe arrestuan Plakun, pa bërë asnjë reagim. Gjatë kontrollit në dhomën e tij, u gjetën dy pistoleta, ndërsa bashkë me Plakun u arrestua edhe miku i tij, Julian Aliaj për akuzën “Mbajtje pa leje të armëve të zjarrit”.
Aliaj është proceduar gjithashtu për “Përkrahje të autorit të krimit” dhe “Mbajtje pa leje të armëve të zjarrit” dhe do të ndiqet nga prokuroria e Vlorës.
Flodian Plaku akuzohet si një nga personat që ka ekzekutuar ish-policin e burgjeve, Gentjan Bejtja, mik të Ervis Martinaj. Më parë për këtë ngjarje është arrestuar Edison Haxhiaj për akuzën “Sigurimi i kushteve për të kryer vrasje”.
Ndërsa, Ilirjan Brahimi miku i Plakut është në proces gjykimi për përfshirje në këtë krim, i cili është kunati i Roan Brahimi.
Atentati ndaj Gentian Bejtjas:
43-vjeçari Gentjan Bejtja u ekzekutua me breshri kallashnikovi, teksa ishte duke vaditur domatet në një serë në oborrin e banesës së tij në fshatin Larushkë. Atentati u regjistrua në orën 16 e 20 minuta të 15 marsit 2024.
Nga hetimet rezultoi se në ngjarje morën pjesë 4 persona. Ata u afruan me automjetin “Land Rover”, më të cilin udhëtuan nga Fushë–Kruja, në drejtim të fshatin Larushkë. Ai që drejtonte makinën, ka ndaluar pranë rrugës kryesore, ndërsa tre të tjerët, të veshur me të zeza e të maskuar, janë afruar në këmbë drejt shtëpisë së Bejtjas, që ndodhej vetëm pak metra larg.
Autorët kishin informacion të saktë për momentin kur duhej të afroheshin, duke qenë në atë koha ka qenë e hapur porta dhe janë futur brenda në oborr ku ndodhej Gentian Bejtja. Autorët sapo kanë parë objektivin e tyre kanë qëlluar të tre me breshëri, me të paktën 50 plumba, duke e lënë të vdekur në vend.
Gjatë kryerjes së veprimeve hetimore ka rezultuar se pas ngjarjes, autorët janë larguar në aksin rrugor Larushkë – Thumanë, pas kalimit të mbikalimit të Fushë Krujës, janë kthyer majtas dhe në fshatin Hasan kanë djegur automjetin e mësipërm.
