Një ngjarje e pazakontë ka ndodhur paraditen e sotme në Shkodër, ku një person me skafandër në kokë, është futur në një argjendari dhe pasi i është kërkuar nga pronari që të heqë skafandër, ka refuzuar dhe është larguar me shpejtësi.
Policia bën me dije se ka dyshime se pasi ka dalë në ambientet e jashtme të argjendarisë, ka kërcënuar me armë zjarri pronarin që të mos ta ndiqte për ta kapur.
Personi gjatë largimit me shpejtësi, ka lënë para dyqanit edhe motorin me të cilin kishte mbërritur. Policia ka nisur hetimet për zbardhjen e kësaj ngjarjeje dhe identifikimin e lokalizimin e tij.
Njoftimi i policisë:
Rreth orës 11:30, në lagjen “Vasil Shanto”, një shtetas ende i paidentifikuar, që qarkullonte me motomjet, ka qëndruar para një argjendarie dhe me skafandër në kokë është futur në argjendari. Pronari i argjendarisë i ka kërkuar që të heqë skafandrën, por ai ka refuzuar dhe është larguar me vrap, duke lënë edhe motomjetin para argjendarisë.
Dyshohet se jashtë ambienteve të saj, ky shtetas i ka drejtuar një armë zjarri pronarit të argjendarisë që të mos ta ndiqte për ta kapur.
Shërbimet e Policisë kanë shkuar menjëherë në vendin e ngjarjes dhe vijojnë kontrollin në zonë për kapjen e tij.
Grupi hetimor, nën drejtimin e Prokurorisë, po punon për identifikimin e autorit dhe dokumentimin ligjor të rastit.
