Tezgat mbushen me mall dhe ky shesh gjallëron nga njerëzit çdo të dielë. Është tregu i Bashkisë së Prrenjasit.
Shi apo diell, baltë e pluhur të dielën aty shiten të gjitha.
Në ditët e tjera, fruta-perimet dhe produktet me origjinë shtazore që kërkojnë kushte të veçanta për tu ruajtur shiten në rrugët e qytetit.
“Unë mendoj që peshku mos të shitet aty, gjithashtu dhe pulat”.
Qytetarët janë sfiduar të kujdesen vete për atë që do blejnë.
“Kam blerë gjizë, kam blerë djathë, pula i ka hapur pendët dhe është mbushur gjithë pluhur. Të bëj bashkia vendin ku të shiten zarzavatet. Edhe këto leckat nuk e kanë vendin për tu shitur këtu. Bashkia e ka gjithë këtë në dorë”.Në qytetin e vogël të minatorëve, banorët ndjehen të harruar nga mungesa e investimeve.
“Ka shtet, nuk ka shtet, ka mbaruar çdo gjë. Ta dijë dhe populli shqiptar se ka mbaruar çdo gjë këtu”.
Disa nuk e fshehin zhgënjimin për pushtetarët që i kanë zgjedhur me votë dhe e kanë humbur shpresën se ditët e mira do të vijnë.
“Shqipëria nuk bëhet me këto qeveritarët që janë në pushtet”.
Në Bashkinë e drejtuar nga Socialistët e pranojnë se kanë dështuar ti japin qytetit një treg agro-ushqimor.
Alban Çekrezi: Ne e kemi parashikuar një treg për gjithë tregtarët e bashkisë Përrenjas, por dhe për tregtarët e zonave përreth. Ata vijnë ditën e diel në qytetin e Përrenjasit por dhe gjatë ditëve të javës dhe gjithë tregtarët vendas shërbejnë në kushte jo të mira.
Thonë se kanë projekt, por nuk kanë para për ta zbatuar.
Alban Çekrezi: Ne kemi një plan për ndërtimin e një tregu të ri bashkëkohor , i cili do të jetë në përputhje më gjitha standartet e duhura.
Derisa Bashkia të sigurojë paratë për të ndërtuar një treg, pazari në Prrenjas do të vijojë në mesjetë.
