Taulant Balla del në komunikim me banda kriminale, zbardhet dokumenti, hetimet ndaj Suel Çelës implikojnë…
Taulant Balla del në komunikim me banda kriminale, zbardhet dokumenti, hetimet ndaj Suel Çelës implikojnë kreun e grupit të PS, dalin detajet nga përgjimet në dosjen hetimore.
Hetimet e zhvilluara ndaj Suel Çelës kanë nxjerrë në dritë përgjime që, sipas dokumenteve hetimore, implikojnë edhe emrin e kreut të grupit parlamentar të Partisë Socialiste, Taulant Balla, në grupe kriminale. Sipas një statusi të publikuar në rrjetet sociale nga dhëndri i ish-kryeministrit Sali Berisha, Jamarbër Malltezi, bëhet fjalë për komunikime të koduara mes personave nën hetim ku përmendet “Tao”.
Në fragmentet e zbardhura të përgjimeve flitet për marrëveshje mes palëve që të mos kërkoheshin tenderë apo favore publike jashtë atyre të dakorduara më herët. Mesazhi i datës 10.02.2020 thuhet se i është përcjellë Taulant Ballës, duke i vendosur edhe një afat kohor deri në muajin dhjetor.
Në përgjigje, sipas dokumentit, Balla kërkon garanci për mbështetje elektorale nëse persona të caktuar përfshihen në lista dhe përfundojnë në burg. Palët përgjigjen se kjo garanci ekziston, ndërsa më pas citohet se “ata do të shkojnë në burg këtë vit”.
Malltezi pretendon se vetëm këto pak rreshta adresojnë disa vepra të rënda penale, duke kërkuar reagim dhe transparencë nga organet e drejtësisë. Deri më tani nuk ka një reagim zyrtar nga Taulant Balla lidhur me këto pretendime, ndërsa më poshtë pasqyrohet reagimi i plotë i z. Jamarbër Malltezi dhe dokumenti që implikon deputetin e PS, Taulant Balla.
Reagimi i z. Jamarbër Malltezi
Në një status në rrjetet sociale, dhëndri i ish-kryeministrit Sali Berisha, Jamarbër Malltezi, ka publikuar një fragment të shkurtër nga përgjimet në dosjen hetimore që po zhvillohen ndaj Suel Çelës, ndërsa emri i përmendur ndër rreshta është Taulant Balla. Malltezi shkruan se në ato pak rreshta përgjimesh ndaj Ballës “adresohen” një sërë veprash penale, duke i renditur ato njëra pas tjetrës.
“Taulant Balla – 5 rreshta tekst, disa vepra penale:
lidhje me krimin e organizuar
tenderë të paracaktuar për krimin i cakton Taulanti
nënshtrim i prokurorisë dhe gjyqësorit sipas porosive të Taulantit
Më datë 10.02.2020, Target informon PIN AM5P80 se kishin rënë dakord mes tyre që të mos i kërkonin Taos asnjë tender publik apo favore të tjera, përveç atyre që kishin rënë dakord të kërkonin. Ky mesazh iu përcoll Taos dhe i dhanë afat deri në dhjetor. Tao iu përgjigj kësaj: a garantoni që të gjithë ata njerëz do të votojnë për ne nëse vendosim në listë ata që doni në burg? Përgjigjja ishte: ‘Po, ne e garantojmë këtë’. Më pas Tao tha: ‘Ata do të shkojnë në burg këtë vit’”, shkruan Malltezi.
Ndërkohë, pak ditë më parë edhe kryetari i Partisë Demokratike, Sali Berisha, akuzoi nga foltorja kreun e grupit parlamentar të Partisë Socialiste, Taulant Balla, se jo vetëm ka rënë në përgjime me banda kriminale, por ka porositur edhe vrasje. Sipas Berishës, dokumentet dhe mesazhet e zbardhura tregojnë se Balla ka vepruar si pjesë e një skeme kriminale të mirëorganizuar.
Ai deklaroi se krimi i organizuar kërkonte futjen e njerëzve të vet në listat e deputetëve, duke marrë garanci direkte për votat në Kuvend. Berisha tha se Taulant Balla, në rolin e kreut të grupit parlamentar, u dha dritën jeshile bandave për të futur emra të diktuar nga burgu. Në sallë u përmendën përgjime ku flitet për marrëveshje të mbyllura dhe afate konkrete për realizimin e tyre.
Sipas Berishës, Mario Çela, i njohur si “Target”, fliste për vrasje të porositura dhe pazare politike të mbuluara me vota. Ai theksoi se këto nuk ishin thjesht favore apo tenderë, por krime të rënda të porositura me mbrojtje politike. Berisha akuzoi Ballën se garantonte personalisht votat nëse kërkesat e bandave plotësoheshin.
“Në datën 20.02.2020, Target, ose Mario Çela, informon PIN-in se kishin rënë dakord mes tyre që të mos i kërkonin Taos asnjë tender publik apo favore të tjera, përveç atyre që kishin rënë dakord të kërkonin. Ky mesazh iu përcoll Taos dhe i dhanë afat deri në dhjetor. Tao iu përgjigj: a garantoni që të gjithë ata njerëz do të votojnë për ne nëse vendosim në listë ata që donin nga burgu? Përgjigjja ishte: Po, ne e garantojmë këtë”, deklaroi Berisha.
Sqarim: Çdo person prezumohet i pafajshëm deri sa fajësia e tij të vërtetohet me vendim gjyqësor të formës së prerë.
Marrë nga Apollon.tv
