Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet dhe ka dërguar në Gjykatën e Posaçme të Shkallës së Parë procedimin penal 141/1 të vitit 2023 ndaj një grupi të strukturuar kriminal, i përfshirë në trafik ndërkombëtar kokaine dhe aktivitete të tjera kriminale.
Ky grup akuzohet për krijimin dhe pjesëmarrjen në një rrjet kriminal me shtrirje ndërkombëtare, i cili bashkëpunoi me organizata kriminale në Amerikën Latine për importimin e lëndës narkotike kokainë drejt Shqipërisë dhe vendeve të Bashkimit Europian.
Të pandehurit janë: Aldi Zonja, Artjon Çaushllari (alias Gjika), Ismajl Abdurrahmani, Jose Ramon Zacarias Vasquez, Geis Sejfullai, Klajd Birçe, Hiwlenn Ledezma Narvaez, Samuel Alfonso Moreno Serrano, Endi Sejdini, Baki Huqi.
Ata akuzohen për veprat penale si “Trafikim i lëndëve narkotike”, “Grup i strukturuar kriminal” dhe “Prodhim dhe shitje e narkotikëve”, sipas Kodit Penal të Shqipërisë. Disa prej tyre akuzohen gjithashtu për “Kryerje veprash penale nga organizata kriminale”.
Hetimet e zhvilluara nga SPAK dhe hetuesit e BKH-së kanë zbuluar se grupi ka organizuar dhe realizuar dy ngarkesa me “lëkurë gjedhësh” nga Republika Domenikane, të cilat fshehën 90 kg kokainë me vlerë tregu prej 3.6 milionë euro. Ngarkesat arritën në Portin e Durrësit në vitin 2024 dhe u magazinuan në disa ambiente në Tiranë, në zonën e Mulletit.
Për këtë aktivitet kriminal të paligjshëm, janë ndarë akte procedurale të reja dhe janë regjistruar hetime të mëtejshme, ndërkohë që vazhdojnë hetimet për individë të tjerë të përfshirë në këtë rrjet. Ky hetim është një nga operacionet më të rëndësishme në luftën kundër trafikimit ndërkombëtar të drogës dhe ka përfshirë përdorimin e teknikave të avancuara të hetimit dhe bashkëpunimin me agjencitë ligjzbatuese ndërkombëtare.
Ky procedim ka rrjedhur nga një hetim i mëparshëm i vitit 2022, ku 11 persona u akuzuan për trafik ndërkombëtar dhe krijim të grupeve kriminale. Hetimet për këtë çështje kanë mundësuar zbardhjen e aktiviteteve të tjera të paligjshme dhe ka çuar në një dënim të mëtejshëm nga Gjykata e Posaçme.
