Një studim i kryer nga Instituti Francez i Shëndetit dhe Kërkimit Mjekësor (INSERM) dhe Universiteti i Dijon, krahasoi të dhënat nga më shumë se 89,500 pacientë me Covid-19 të shtruar në spital midis marsit dhe prillit dhe mbi 45,800 pacientë të shtruar në spital për gripin sezonal midis dhjetorit të vitit 2018 dhe 28 shkurt, 2019.
Rezultatet e studimit u botuan të premten në revistën The Lancet Respiratory Medicine. Raporti tregoi se shkalla e vdekshmërisë është tre herë më e lartë për Covid-19 në krahasim me gripin sezonal, përkatësisht 16.9% dhe 5.8%.
Ndërkohë, shtrimet në spital ishin dy herë më të shpeshta për Covid-19 sesa për gripin sezonal me një numër më të madh të pacientëve me Covid-19 të pranuar në kujdesin intensiv – 16.8% kundrejt 10.8%. Qëndrimet në ICU ishin gjithashtu më të gjata për pacientët me Covid-19 me një mesatare prej 15 ditësh krahasuar me 8 ditë për gripin sezonal.
Por studiuesit vunë në dukje se ndryshimi në nivelet e shtrimit në spital mund të jetë pjesërisht për shkak të imunitetit ekzistues ndaj gripit, ose për shkak të një infeksioni të mëparshëm ose për shkak të vaksinimit.
Catherine Quantin, një profesore në Universitetin e Dijon dhe studiuese për INSERM, theksoi se “ky studim është më i madhi deri më tani duke krahasuar dy sëmundjet dhe konfirmon që sëmundja Covid-19 është shumë më serioze sesa gripi”.
“Raporti që shkalla e vdekjes nga Covid-19 ishte tre herë më e lartë sesa për gripin sezonal është veçanërisht e habitshme kur kujtojmë se sezoni i gripit 2018/2019 ishte më i keqi në Francë në lidhje me vdekjet në pesë vitet e fundit,” shtoi ajo.
