Një ngjarje tronditëse ka ndodhur në Ciriè, ku një grua 38-vjeçare është arrestuar dhe dërguar në burg me akuzën e tentativës së vrasjes së foshnjës së porsalindur. Sipas Corriere di Torino, gruaja dyshohet se e la vajzën e saj të porsalindur me kokën pothuajse tërësisht të zhytur në tualet për rreth 20 minuta.
Foshnja në gjendje kritike
Foshnja u shpëtua nga personeli i urgjencës, i cili arriti ta ringjallë dhe ta dërgojë me urgjencë në Spitalin Maria Vittoria në Torino. Ajo vazhdon të ndodhet në kujdesin intensiv neonatal, në gjendje shumë të rëndë por të qëndrueshme. Mjekët shprehin shqetësim, pasi e porsalindura ka qëndruar për një kohë të gjatë pa oksigjen.
Si ndodhi ngjarja
Sipas rindërtimit paraprak nga karabinierët, 38-vjeçarja ka lindur vetëm, në banjën e banesës së saj, e mbështetur mbi tualet. Kur vëllai i saj është kthyer në shtëpi, ai ka gjetur dhomën të mbuluar me gjak dhe motrën ende në banjo. Në tualet ai ka vënë re foshnjën me kokën e zhytur në ujë. Menjëherë ai ka telefonuar shërbimet e emergjencës.
Deklarimet e nënës dhe dyshimet e hetuesve
Gruaja u ka thënë hetuesve se nuk e dinte që ishte shtatzënë dhe se ishte trembur nga lindja e papritur. Megjithatë, ky version konsiderohet i pabesueshëm nga karabinierët. Prokuroria e Ivreas, e cila ka juridiksion mbi zonën, po heton rastin si tentativë vrasjeje.
Sipas burimeve hetimore, gruaja ka një të shkuar të vështirë, të përshkruar si “mjaft e egër”, dhe më herët ka pasur probleme me varësinë nga droga. Prej disa muajsh ajo jetonte sërish në shtëpinë e familjes së bashku me nënën dhe vëllain. Të afërmit kanë deklaruar se nuk kishin asnjë dijeni për një shtatzëni.
Hetimet vazhdojnë
Karabinierët dhe prokuroria po punojnë për të sqaruar plotësisht dinamikën e ngjarjes dhe gjendjen psikologjike të nënës në momentin e lindjes. Ndërkohë, e gjithë vëmendja e mjekëve mbetet tek shpëtimi i të porsalindurës, e cila lufton për jetën në spitalin e Torinos./vizionplus.tv
