Detaje të reja po dalin në dritë për 33-vjeçarin, nipin e Kostas Tomaras, i cili akuzohet si truri pas vrasjes së pronarit 68-vjeçar të kampingut në Finikounda. Sipas raportimeve të SKAI-t, i riu kishte shprehur shpesh dëshirën për t’u larguar nga vendi, duke u thënë familjarëve: “Mos më shqetësoni, sepse do të shes gjithçka dhe do të shkoj në Tajlandë.”.
Hetuesit dyshojnë se ky plan arratisjeje ishte i lidhur me veprimet e tij të fundit, pasi ai kishte nxjerrë tashmë në ankand 10 prona të xhaxhait, pasuri që ai trashëgonte si i vetmi përfitues ligjor para arrestimit. Kjo lëvizje shihet si tentativë për likuidimin e aseteve para se të largohej nga Greqia.
Ndërkohë, policia vazhdonte të ngushtonte rrethimin rreth 33-vjeçarit dhe mikut të tij, i cili akuzohet gjithashtu për nxitje të vrasjes së dyfishtë. Të dy u arrestuan mesditën e së mërkurës, ndërsa hetimi për krimin mbetet ende i hapur.
Me arrestimin e nipit, çështja e trashëgimisë ka marrë drejtim të ri. Pasuria e 68-vjeçarit, që vlerësohet në disa milionë euro dhe përfshin prona të shumta të paluajtshme e toka, do t’i kalojë motrës së viktimës, e cila tani konsiderohet trashëgimtarja ligjore. Edhe nëse nipi shpallet fajtor si nxitës, ai përjashtohet nga çdo përfitim.
Rasti i vrasjes së dyfishtë në Finikounda nuk është ende i mbyllur. Autoritetet presin arrestimin e një personi të tretë, aktualisht në Gjermani për arsye turistike. Ky individ dyshohet se transportoi 22-vjeçarin nga Finikounda në Kalamata, person i cili fillimisht pretendoi se ishte vetëm bashkëpunëtor dhe se kishte “notuar” deri në qytet për t’i shpëtuar ndjekjes. Megjithatë, hetimet e tanishme e identifikojnë atë si autorin kryesor të ekzekutimit të pronarit dhe kujdestarit të kampingut.
Policia greke ka kërkuar ndërhyrjen e autoriteteve gjermane për arrestimin e të dyshuarit të tretë, ndërsa zhvillimet pritet të vijojnë në ditët në vijim me prurje të tjera të rëndësishme për zbardhjen e plotë të krimit që ka tronditur opinionin publik.
