Policia e Krujës ka vijuar goditjet e njëpasnjëshme ndaj veprimtarisë kriminale të shitjes së lëndëve narkotike. Gjatë një operacioni të realizuar është arrestuar në flagrancë 26-vjeçari E. P., i cili dyshohet se po transportonte dhe posedonte lëndë narkotike kokainë me qëllim shitjen e saj në doza.
Specialistët për Hetimin e Krimeve të Komisariatit të Policisë Krujë, duke u bazuar në informacionet e siguruara në rrugë operative, kanë realizuar kontrollin e automjetit të të arrestuarit në Rinas. Gjatë këtij kontrolli, është gjetur një sasi prej 23.5 gramë kokainë, të cilën 26-vjeçari dyshohet ta ketë pasur për shpërndarje.
Pas arrestimit, policia ka vijuar me kontrollin e shtëpisë së tij, ku janë gjetur dhe sekuestruar 9 steka cigare pa pullë fiskale, një tjetër aktivitet i paligjshëm që po hetohet nga autoritetet. E. P. është një person me precedentë të mëparshëm për veprimtari kriminale në fushën e narkotikëve.
