Një aeroplan i United Airlines u detyrua të bënte një ulje emergjente pas turbulencave të forta gjatë një fluturimi nga Nigeria në Shtetet e Bashkuara, duke plagosur gjashtë pasagjerë.
Në videot e publikuara nga brenda avionit 613, me destinacion Uashingtonin, duken momentet e panikut në bord dhe korridoret e mbushura me objekte.
Linja ajrore tha në një deklaratë se ishte një çështje teknike që shkaktoi ngjarjen e papritur. Mësohet se Boeing 787-8, kishte në bord 245 pasagjerë, tetë anëtarë të ekuipazhit dhe tre pilotë.
“FlightRadar24” regjistroi avionin duke bërë një ulje të papritur 93 minuta pas ngritjes, për shkak të turbulencave të forta.
“Aeroplani u ul i sigurt në Lagos. Katër pasagjerë dhe dy stjuardesa pësuan lëndime të lehta, u dërguan në spital për ndihmën e parë dhe janë liruar”, tha një zëdhënës i United Airlines.
Sipas informacioneve, i njëjti avion u detyrua të bënte ulje emergjente edhe disa ditë më parë teksa kryente të njëjtën rrugë, por ende nuk është sqaruar nëse incidentet kanë lidhje me njëri-tjetrin.
