Erion Alibej ka rrëfyer edhe bisedat me Suel Çelën pas vrasjes së vëllait dhe dy të tjerëve në atentatin e vitit 2018.
Çela i ka thënë me garanci se nuk qëndronte ai pas atentatit me 3 të vrarë, por Alibej e kishte vënë në dijeni se një nga ‘ushtarët’ në krim ishte anëtar i tij, nga Shkodra.
Gjithashtu ka rrëfyer detaje mbi motivin e mundshëm të vrasjes së avokat Ravik Gurrës në Elbasan, por Sueli i kishte treguar se “i futi shumë hunët te ‘maci’ (Klodian Çopja)”.
Erioni tha në gjykatë se ngjarja ishte drejt zbardhjes nga ish-drejtori Altin Qato në atë kohë, por atë e hoqën nga Elbasani për arsye të panjohura dhe u emërua Arjan Muça në vend të tij.
Një polici i kishte siguruar Alibejt edhe akses në sistemin TIMS për informacion, kurse ky i fundit i kishte dhënë një telefon të enkriptuar me platformën SKY ECC.
Dëshmia e Erion Alibejt:
“I thashë Suelit që një nga gjujtsit është ushtari jot, një shkodran që thirrej “Naqo”. Sueli i shkuajti direkt atij. Pastaj në bisedë i thashë po me avokat Ravikun ça patët? Më tha ‘i futi hunët shumë tek “maçi” (Klodian Çopja). Kam fol shumë aty me Suelin dhe më garantoi se janë Çopjat pas asaj që më ndodhi.
Tek Ardian Çollaku, që sot është i ndjerë, mora informacion, por unë u lidha dhe me një punonjës policie, i dhashë një Sky Ecc, kisha akses në TIMS përmes tij, kërkoja informacion për emra, ai m’i çonte me foto të dhënat. Emrin s’po e them se është në hetim.
(Ndërhyn prokurori: S’ka nevojë, se s’është objekt i këtij gjykimi).
Nga ky person mora vesh se nga hetimet kishte dalë një motor që ndiqte “Range Rover”, mora vesh që Altin Qato ishte drejt zbardhjes së ngjarjes, por nuk e di, nuk e lanë dhe e larguan nga aty, erdhi Arjan Muça më pas drejtor”.
