Seanca në Gjykatën e Apelit të Përgjithshëm ndaj Arbër Paplekajt dhe personave të tjerë në lidhje me vrasjen e Pjerin Xhuvanit në prill të 2021, është shtyrë për në 14 Shkurt, ora 12:30.
Seanca u shty pasi avokatja e familjarëve të Pjerin Xhuvanit, nuk ishte njoftuar në rrugë zyrtare për seancën e kësaj të marte.
“Për shkak se avokatja e familjarëve të Pjerin Xhuvanit nuk kishte marrë njoftim, kishte kërkuar shtyrje të seances, dhe njoftimin e kësaj të fundit përmes rrugës zyrtare. Prokurori i kërkoi gjykatës rinjoftimin e personave që janë pjesë e këtij procesi. Gjykata kërkoi njoftimin përmes rrugës zyrtare të familjarëve të viktimave”, raportoi ndër të tjera gazetari Vija.
Paplekaj është dënuar me 22 vite burg nga gjykata e Shkallës së Parë në Elbasan për ‘vrasje në rrethana cilësuese’.
Paplekaj nuk ishte i pranishëm në seancën e së martës, ndërsa mbrohej nga avokati Marash Martini. Prokurori i Apelit, Genti Xholi kërkoi shtyrjen e seancës për shkak se avokatja e familjarëve të Xhuvanit nuk ishte njoftuar nëpërmjet adresës zyrtare, por përmes telefonit nuk ishte paraqitur në seancë.
Prokurori kërkoi në të njëjtën kohë njoftimin edhe njëherë të një prej personave që mbeti i plagosur gjatë konfliktit që ndodhi pak ditë para zgjedhjeve të përgjithshme që u mbajtën në prill të vitit 2021.
Pjesë e këtij procesi janë edhe dy nën ish drejtorët e policisë së Elbasanit, Albert Nushi e Nikollaq Palla, që u dënuan për shpërdorim detyre me 16 muaj shërbim prove. Edhe gjashtë efektivët e forcave Shqiponja kanë marrë të njëjtin dënim për akuzën e shpërdorimit të detyrës./abcnews.al
