Vendimi i qeverisë shqiptare për ekuivalentimin e gradave në Forcat e Armatosura, Gardën e Republikës, Shërbimin Zjarrfikës dhe Policinë e Burgjeve, është publikuar në Fletoren Zyrtare dhe ka hyrë zyrtarisht në fuqi.
Me këtë ligj të ri ushtarakët e Forcave të Armatosura, të çdo niveli, efektivët e Gardës së Republikës po ashtu të çdo niveli, punonjësit e Shërbimit Zjarrfikës dhe ata të Policisë së Burgjeve, mund të përfshihen në radhët e uniformave blu.
Ekuivalentimi i gradave i lejon këta punonjës të sigurisë kombëtare që të ndryshojnë karrierë, duke fituara grada të përafërta me ato që mbajnë aktualisht, në varësi të skemës së publikuar dhe në Fletoren Zyrtare.
Ndërkohë, për ekuivalentimin me gradën “nënkomisar” pranë Policisë së Burgjeve, kandidati duhet të zotërojë një diplomë të arsimit të lartë, të lëshuar nga institucionet e arsimit të lartë, të licencuara dhe të akredituara sipas dispozitave në fuqi në kohën e lëshimit të diplomës ose të zotërojë një diplomë të të njëjtit cikël, të lëshuar nga një institucion i huaj i arsimit të lartë, të njohur e të njësuar pranë ministrisë përgjegjëse për arsimin.
Me vendim të Këshillit të Ministrave, përgjegjëse për zbatimin e këtij vendimi janë përzgjedhur Ministria e Drejtësisë, Ministria e Brendshme dhe Ministria e Mbrojtjes.
)
