Një zjarr ka rënë në Repartin e Psikiatrisë në Qendrën Klinike Universitare të Kosovës. Flakët e zjarrit kanë përfshirë një dhomë të kësaj klinike. Si pasojë një person ka humbur jetën ndërsa 5 të tjerë janë plagosur.
Sipas njoftimit zyrtar të Shërbimit spitalor zjarri ka rënë në orën 23:00 dhe dyshohet se është vënë nga pacienti i cili humbi dhe jetën prej asfiksimit, përkundër përpjekjeve të stafit për t’i shpëtuar jetën.
Njoftimi:
Qendra Klinike Universitare e Kosovës (QKUK), njofton se mbrëmë rreth orës 23:00, në Repartin e Urgjencës dhe Intensives Psikiatrike ka ndodhur një zjarr, në njërën nga dhomat e tipit të mbyllur, ku qëndrojnë pacientët përkohësisht, pacientë në gjendje të agresivitetit dhe agjitimit të theksuar psikomotor, jo koshient për gjendjen mendore.
Në të njëjtin Repart, në të njëjtën kohë, dyshohet se një pacient i ka vënë zjarrin në rrethana të panjohura dhomës së tipit të mbyllur, me ç’rast si pasojë e ngulfatjes nga tymi (asfiksioni) ai ka humbur jetën, përkundër përpjekjeve maksimale të stafit shëndetësor për ta shpëtuar pacientin.
Gjithashtu gjatë kësaj kohe, një paciente tjetër ka pësuar shenja të helmimit nga tymi, e poashtu e tërë ekipi kujdestare, dy mjekë dhe dy infermiere të cilët gjatë ofrimit të ndihmës për pacientin në fjalë dhe evakuimit të pacientëve të tjerë, kanë manifestuar shenja të helmimit nga tymi dhe kanë marrë ndihmë mjekësore në Klinikën Emergjente.
Rasti është duke u hetuar nga njësitet përkatëse të Policisë së Kosovës.
