Parlamenti zviceran ka kaluar këtë të premte një ligj për të lejuar martesat homoseksuale në vend. Ky vendim është cilësuar si një fitore historike nga komuniteti LGBT dhe organizatat të tjera të të drejtave të njeriut.
Projekt-ligji i martesave për të njëjtën gjini që tashmë është është miratuar nga të dyja dhomat e parlamentit në Zvicër, vjen pas një debati të rëndësishëm public që ka nisur prej vitit 2013.
Partneritetet civile janë të ligjshme në Zvicër që nga viti 2007, por aktorë të shoqërisë civile shpreheshin se vendi kishte mbetur prapa vendeve të tjera europiane në ngurrimin e tij për të lejuar që çiftet e të njëjtit seks të martohen.
Projekt-ligji u prezantua për herë të parë nga Partia e Gjelbër në 2013-ën, dhe versione të ndryshme të tekstit janë debatuar që prej asaj kohe. Pjesa më e madhe e debatit ndërkaq u përqendrua për kushtetutën e vendit, teksa ligjvënësit ngrinin pyetje nëse do të duhej të ndryshohej para se të prezantohej martesa e të njëjtit seks. Sidoqoftë, Dhoma e Lartë e Parlamentit zviceran – vendosi në fillim të këtij muaji se nuk kishte nevojë për të ndryshuar kushtetutën, pasi formulimi rreth martesës ishte tashmë gjithëpërfshirës: “E drejta për t’u martuar dhe për të pasur një familje është e garantuar.”
Ndërkohë, Partia Federale Demokratike – një parti politike me frymë të krishterë – ka kërkuar që martesa mes një çifti të gjinisë së njëjtë të kalojë në referendum para se të legalizohet. Sipas ligjit zviceran, referendumi për këtë çështje mund të thërritet nëse mblidhen mjaft nënshkrime.
Shoqata Rainbow Families, një organizatë LGBT në Zvicër, tha në njoftimin zyrtar se është “e gatshme” për një referendum dhe se ka mbështetje të gjerë publike për martesat e të njëjtit seks.
Mediet zvicerane kanë bërë me dije rezultate të sondazheve të ndryshme ku zbuluan se një shumicë prej rreth 82% e popullsisë i mbështeste martesat e të njëjtit seks, por në demokracitë e zhvilluara si Zvicra, vendimi është në duart e qytetarëve, me Referendum.
Ora news
