Shoqata e Anestezistëve dhe Reanimatorëve të Shqipërisë ka reaguar në lidhje me arrestimin e kolegut të tyre ditën e djeshme në ambjentet e punës. Mjeku anestezist është kapur ne flagrancë për rryshfet nga një polic i infiltruar është shoqëruar nga policë me maska e jelekë antiplumb sikur të ishte “kriminel” me rrezikshmëri të lartë.
Në reagimin e bërë, kolegët e tij shprehen të indinjuar me mënyrën e arrestimit të mjekut, arrestim që sipas tyre ishte bërë vetëm për bujë mediatike.
Njoftimi i plotë:
Shoqata e Anestezistëve dhe Reanimatorëve të Shqipërisë po ndjek me shumë vëmendje rastin e ndalimit të kolegut tonë anestezist në Spitalin e Traumës, Fitim Marku. Ndërkohë që mbështesim cdo veprim të organeve ligjzbatuese për hetimin dhe ndëshkimin e cdo shkeljeje të kryer nga kushdo gjatë ushtrimit te detyrës, shprehim shqetësimin tonë për mënyrën denigruese të ndalimit të mjekut. Pamje të tilla, të bëra publike, ku mjeku me uniformë shoqërohet nga policë të maskuar nuk i shërbejnë askujt që kërkon me të vërtetë përmirësimin e shërbimit shëndetësor në vend. Vlen të kujtojmë se operacione të tilla, të organizuara me kaq bujë mediatike, nuk i kemi parë as në rastet e ndalimit të kriminelëve të rrezikshëm apo zyrtarëve të lartë të akuzuar për korrupsion të përmasave të mëdha! Jemi të sigurt që kolegu mjek do të ishte paraqitur pranë organeve përkatëse edhe me një fletëthirrje të thjeshtë. Të mos harrojmë as vijën shumë të hollë që ndan simulimin gjatë hetimit dhe provokimin, gjë që ata që organizojnë operacione të tilla e dinë shumë mirë. Urojmë që kolegu të provojë pastërtinë e figurës së tij, nëpërmjet një procesi të drejtë ligjor!
