Dy raste të dhunës në familje janë goditur nga policia në qytetin e Fierit. Janë arrestuar dy shtetas brenda 12 orëve.
Në njërin rast, A.B., 29 vjeç dhunonte në mënyrë sistematike fizikisht dhe psikologjikisht bashkëshorten, e përndiqte dhe i kishte shpërndarë në rrjete sociale një video intime të saj. Policia bëri të mundur arrestin e tij në flagrancë dhe gjatë kontrollit iu gjet edhe një sasi kanabisi, e cila u sekuestrua.
Në rastin tjetër, shtetasi Z.M., 38 vjeç, banues në Patos dhunoi ish-bashkëshorten e tij, e cila ishte e pajisur me urdhër-mbrojtjeje. Z.M., u kap në flagrancë teksa materialet proceduriale i kanë kaluar Prokurorisë në Fier.
Njoftimi i Policisë:
Fier
Në kuadër të operacionit “Sundimi i ligjit”, arrestohen në flagrancë, brenda 12 orëve, 2 shtetas, për dhunë ndaj familjarëve.
Dhunonte fizikisht dhe psikologjikisht bashkëshorten, e përndiqte dhe i shpërndau në rrjete sociale, një video intime, Policia vë në pranga 29-vjeçarin.
Shkeli urdhrin e mbrojtjes dhe dhunoi ish-bashkëshorten, Policia vë në pranga 38-vjeçarin.
Specialistët për Hetimin e Krimeve të Komisariatit të Policisë Fier, pas denoncimit nga një shtetase 27 vjeçe se bashkëshorti i saj kishte ushtruar sistematikisht dhunë fizike dhe psikologjike dhe për këtë arsye kjo shtetase ishte larguar tek prindërit në Kosovë, organizuan punën për kapjen e tij.
Shërbimet e Policisë bënë të mundur lokalizimin, kapjen dhe arrestimin në flagrancë të shtetasit A. B., 29 vjeç, banues në Fier.
Ky shtetas, në mënyrë sistematike, ka ushtruar dhunë fizike dhe psikologjike ndaj bashkëshortes, e përndiqte dhe i kishte shpërndarë një video intime të saj, në rrjetet sociale.
Nga kontrolli i ushtruar në banesën e këtij shtetasi, u gjet dhe u sekuestrua një sasi e vogël lende e dyshuar narkotike cannabis sativa.
Gjithashtu, specialistët për Hetimin e Krimeve të Stacionit të Policisë Patos arrestuan në flagrancë shtetasin Z. M., 38 vjeç, banues në Patos, pasi ka dhunuar ish-bashkëshorten e tij, e cila ishte e pajisur me urdhër mbrojtjeje.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme, për veprat penale “Dhuna në familje”, “Përndjekja”, “Dhunimi i banesës” dhe “Prodhimi dhe shitja e narkotikëve”.
