Policia Rrugore ka vijuar kontrollet edhe gjatë mbrëmjes së djeshme në rrugën interurbane Tiranë-Elbasan, ku janë konstatuar me radar shpejtësi që cënojnë sigurinë e jetës deri në 165 – 176 km/h.
Rrugorët e kryeqytetit vijojnë patrullimet dhe kontrollet parandaluese në rrugët urbane dhe interurbane, duke përdorur të gjitha kapacitetet teknike dhe njerëzore në funksion të sigurisë.
Për 4 orë monitorim, u pezulluan 10 leje drejtimi dhe u vendosën 22 masa administrative për shpejtësi mbi normën e lejuar, por pa sanksionin plotësues të pezullimit të lejes së drejtimit.
“Duke vlerësuar shqetësimin qytetar dhe rrezikun që shkakton shkelja e rregullave të qarkullimit rrugor, e adresuar në forma dhe mënyra të ndryshme, e ndërsa pritet një reflektim pozitiv nga përdoruesit e rrugës, konstatimet e rrugorëve, telefonatat dhe denoncimet e qytetarëve nëpërmjet aplikacionit të Komisariatit Dixhital, tregojnë se ka akoma shumë punë për të disiplinuar të “pabindurit” dhe “vrasësit e sigurisë në rrugë”. Mjafton të referosh disa nga shkeljet kryesore të evidentuara përgjatë muajit korrik nga Policia Rrugore e kryeqytetit, të cilat mbartin jo vetëm disa numra statistikor, por dhe shkallën e lartë të rrezikut dhe neglizhencës që karakterizon akoma drejtuesit e mjeteve, që vijojnë të luajnë me sigurinë e jetës së tyre dhe të të tjerëve në rrugë”, thuhet në njoftimin e Policisë.
Gjatë muajit korrik, nga Policia Rrugore e Tiranës janë arrestuar për drejtim mjeti në gjendje të dehur 38 drejtues mjetesh dhe 33 të tjerë pa leje drejtimi.
Po ashtu, 18 drejtues mjetesh u arrestuan në flagrancë për “Korrupsion aktiv ndaj personave që ushtrojnë funksione publike”, ndërsa 13 të tjerë u proceduan penalisht për përdorim të simboleve të Policisë së Shtetit.
Policia pezulloi 572 leje drejtimi, nga të cilat 172 për drejtim mjeti nën efektin e alkoolit, 276 për shpejtësi mbi normat e lejuara dhe 124 për shkelje të tjera të rregullave të qarkullimit rrugor.
/m.m/r.e/