Sot është dhënë masa e sigurisë në spital për Denisa Dokun, e ndaluar për aksidentin e 5 dhjetorit në Kamëz ku mbeti e vrarë 22-vjeçarja Alida Spahiu.
Prindërit e viktimës i kanë kërkuar gjykatës që 19 vjeçarja Denisa Doku të mos ndiqet penalisht.
“Marrëdhëniet tona me familjen Doku janë të sqaruara. Kemi marrëdhënie familjare pasi Alida ishte e fejuara e vëllait të Denisës”, janë shprehur ata. Ndërkohë që kanë bërë edhe një akt noterial.
Ndërkohë avokati Bardh Koçi ka kërkuar një masë më të lehtë sigurie.
Sipas tij, vajza është studente dhe duhet ti jepet mundësia të vazhdojë shkollën.
Avokati: Duhet të ndalohej edhe drejtuesi i benzit deri sa të dalë ekspertiza. Aksidenti ka ndodhur në momentin që Smarti do të merrte kthesën. Drejtuesja e mjetit nuk ka qenë e alkoolizuar dhe nuk ka qenë me shpejtësi.
Pak ditë më parë Ora News publikoi videon e momentit të aksidentit ku shihej momenti kur makina Smart, në timonin e së cilës ndodhej 19-vjeçarja Deni Doku, i del para një makine Benz që vinte në kahun e kundërt të rrugës.
Përplasja është tepër e forte, ndërsa makina e vogël në të cilën udhëtonte Doku së bashku me 22-vjeçaren Alida Spahiu bën një rrotullim thuajse 360 gradë, duke u përplasur edhe me një automjet që po vinte nga pas.
Dy vajzat mbetën fillimisht të plagosura, në gjendje më të rëndë e reja 22-vjeçare, e cila fatkeqësisht dje humbi jetën në spital.
Drejtuesja e automjetit, Deni Doku është arrestuar nga policia veprën penale “Shkelja e rregullave të Qarkullimit Rrugor”.
ora news
