Kur kanë kaluar 12 orë nga atentati i mbrëmshëm që tronditi fshatin Dukat të Vlorës, policia ende nuk ka asnjë gjurmë nga autorët e vrasjes së 27-vjeçarit Benjamin Bozhani. Kjo dhe për shkak të terrenit të vështirë ku ndodhi krimi.
Ora News u rikthye mëngjesin e sotëm në vendin ku ndodhi ngjarja. Shiriti i vendosur nga policia të sinjalizon për zonë krimi.
Një i afërm i viktimës thotë se i riu së bashku me familjen ishin njerëz të rregullt dhe se nuk ka dijeni për ndonjë konflikt të tyre.
“Njeri shumë i rregullt, familje shumë e mirë. Nuk ka pasur konflikte. Jemi shumë të prekur, iku një djalë në lule të rinisë.”
Merren në pyetje mbi 10 persona
Burimet brenda bluve të Vlorës bëjnë me dije se gjatë këtyre orëve janë marrë në pyetje mbi 10 persona, dëshmimtarë që mund ta kenë parë ngjarjen, të afërm të viktimës dhe banorë të fshatit.
Makina u bë shoshë nga plumbat e kallashnikovit
Të njëjtat burimet bëjnë me dije se Bozhan është qëlluar me armë kallashnikov nga një distancë e afërt mbi 10 herë nga pjesa e përparme e makinës.
Pjesa më e madhe e plumbave kanë goditur trupin e 27 vjeçarit. Makina në të cilën udhëtonte i riu, “Mercedes-Benz” ngjyrë gri, është bërë shoshë nga plumbat.
Pistat e hetimit
Policia e Vlorës po heton disa pista ku më kryesoret janë e shkuara e 27 vjeçarit, i cili ka vuajtur një dënim në Itali dhe ishte kthyer në Vlorë pak ditë më parë, por edhe konflikte të kohëve të fundit.
Benjamin Bozhani është djali i Faslli Bozhanit,i cili është pjesë e njësisë administrative.
Ngjarja ka ndodhur 50 metra larg rrugës kryesore Vlorë-Llogara.
ora news
