Deputeti i PS-së, Taulant Balla ka reaguar përmes një statusi në Facebook lidhur me fillimin e sesionit të ri parlamentar në vend.
Balla shkruan se do të jetë i pari që do bëj më shumë në këtë mandat të tretë me PS si shumicë parlamentare.
Ai shton se prandaj të mos habiten asnjë nga kolegët e tij të grupit që do të kërkojë më shumë nga të gjithë në përmbushje të besimit që shqiptarët u kanë dhënë.
Balla: Kam dëgjuar e lexuar shumë fjalë dhe interpretime për mua këto ditë dhe sonte vendosa të them disa fjalë, të cilat i thashë paradite edhe në mbledhjen e sotme të Grupit Socialist në Kuvend. Sa të kem forcën për tu marrë me politikë unë jam një socialist, i cili e ka të shenjtë frymën e ekipit, të respektit dhe të disiplinës në familjen më të madhe politike të shqiptarëve. E kam nisur karrierën në PS si një anëtar i thjeshtë 27 vite më parë dhe hap pas hapi kam marrë nga kjo parti dhe votuesit e saj aq shumë mbështetje, duke kulmuar më 25 Prill në qarkun e Elbasanit, nder që dua vetëm t’ia kthej çdo ditë me gjithë forcat e mia.
Nuk i kam dashur dhe nuk i dua kurrë ata që e harrojnë nga janë nisur dhe nuk shikojnë sa vite e sa punë ka akoma përpara. Përsëri prej sot në krye të Grupit Socialist në Kuvend, ku jam më i motivuar se kurrë dhe do të jem i pari që do bëj më shumë në këtë mandat të tretë me PS si shumicë parlamentare, prandaj mos habitet asnjë nga kolegët e mi të grupit që do të kërkoj më shumë nga të gjithë në përmbushje të besimit që shqiptarët na kanë dhënë.
ora tv
